بلوچستان بار کونسل کے ممبر افضل حریفال ایڈووکیٹ نے ممبر خیبر پختونخوا بار کونسل اور سابق صدر پشاور بار ایسوسی ایشن علی زمان ایڈووکیٹ کے اسلام آباد سے نامعلوم افراد کے ہاتھوں اغوا پر گہری تشویش کا اظہار کیا ہے۔ اپنے جاری کردہ بیان میں افضل حریفال ایڈووکیٹ نے کہا کہ وکلا برادری قانون کی بالادستی، انسانی حقوق اور انصاف کے قیام کیلئے ہمیشہ پرامن جدوجہد پر یقین رکھتی ہے، ایسے واقعات نہ صرف وکلا برادری بلکہ پورے معاشرے کیلئے باعثِ تشویش ہیں۔ انہوں نے مطالبہ کیا کہ علی زمان ایڈووکیٹ کی بحفاظت بازیابی کیلئے متعلقہ ادارے فوری اور سنجیدہ اقدامات کریں اور واقعے کے حقائق سامنے لائے جائیں تاکہ وکلا برادری میں پائی جانے والی بے چینی کا ازالہ ہو سکے۔افضل حریفال ایڈووکیٹ نے دعا کی کہ علی زمان ایڈووکیٹ جلد از جلد خیریت سے اپنے اہلِ خانہ اور ساتھی وکلا کے درمیان واپس آئیں، اور ایسے واقعات کی روک تھام کیلئے مؤثر اقدامات کو یقینی بنایا جائے۔
Comments 0